Archivale

E 4/34 Nr. 5

E 4/34 Hausarchiv Burgstr. 8

Hausarchiv Burgstr. 8

15.06.1513

Ich vlrich Erckel der Elder Burger zu Nurmberg thu kunth allermeniglich Nachdem der Erber Mathes Sawerman Burger zu Nurmberg von aus vnd ab meiner Eckbehausung auff der rechten seittenn gegen dem Prediger Closter vber vnd auff der lincken seitten seins einganks an Cristoff scheurls haus stossennde vndter der vesten gegen der Schiltrören vber gelegenn wie die durchaus hintten vnd vornenn vmb fangen vnd begriffen ist die Aigenschafft mit sampt Sechtzig guldin reinisch Jerlichs vnnd ewigs eigenn zyns vnnd gelts altes nach besag vnd ausweisung briefflicher vrkundt darüber außganngen die egenanter Sawerman beyhenndig hat etc. also vergihe vnnd Bekenn ich vlrich Erckel obgemelt für mich alle mein Erben vnd nachkumen mit diesem brieff das Ich dem Egedachten Mathes Sawerman vnnd Seinen Erbenn für mich vnd mein Erben die angezogen mein Behausung von wegen der Sechtzigk guld[en] Reinisch Jerlichs vnd ewigs aigen zyns vnnd geltzs frey vber geben hab vnd vbergib Im auch die vnd drit Im der vnd aller meiner vnd meiner Erben daran habenden gerechtigkait hiemit frey ab entyusser (sic) entschlage vnd verzeihe mich auch darauff für mich vnd alle mein erben der vorbemelten Behausung- mit aller vnd yegklicher irer gerechtigkaiten, nutzung ein vnd zugehörung leuterlich vnd gentzlich, mit rechter wissen In crafft dits brieffs wie dann soliche verzeichung Inner oder ausserhalb rechtens am allerkrefftigisten vnd bestendigisten geschehen soll kann vnnd mag vor allermeniglichs widerthailen vnd absprechen als het Er oder sein Erben die gegen mir und meinen Erben auff vnser widerfechten zu recht erclagt eruolgt erlangt vnd erstannden Sie auch In die angezogen Behausung und derselben gerechtigkait In nützlich und heblich gewere wie sich gepürt und recht ist eingesezt hab unnd haben wil, nymmer mer kein clag vorderung ansprach noch recht, darumb darnach noch daran zuhaben zuthun noch zugewynnen weder mit gerichs gaistlich noch weltlich noch Jungst In khein weise noch wege wie das menschen synn vnd vernunfft erdenncken khunt oder möcht fürpas ewiglich, argelist und geuerde hierInn gancz außgeschlossen. Und des alles zw warem urkhundt unnd steter haltung aller obgeschriben sachen so hab Ich obgedachter ulrich Erckel für mich und mein Erben mein aigen Insigel In diesen brieff bey ende der schriefft gedruckt und darzu mit vleiys erpetten den Erbarn Georgen Emeß Amtman vnd Berckmeister zu Ilmena das er sein Insigel zw dem meinen gedruckt hatt des Ich Georg Emeß also geschehen bekentlich pin doch mir vnnd mein Erben on schaden Der geben ist auff mitwoch Sanct veits tag Im fünffzehenhunderte und dreizehenten Jare.L[oco] S[igilli] Das Ercklische L[oco] S[igilli] Das Emeßische Insigel, dieses ein bloßes KaufmannspetschierSiegler: Ulrich Erckel und Georg Emeß, Amtmann und Bergmeister zu Ilmenau

Umfang/Beschreibung: ein Bogen Papier; außen: N.5.

Archivale

Indexbegriff Sache: Klassifikation E/F-Bestände: E 4/34 - Burgstr. 8

Emeß, Georg
Erckel, Ulrich d.Ä.
Sauermann, Matthes
Scheurl, Christof

Burgstr. 8
Ilmenau
Predigerkloster
S 605
Schildröhre, gegenüber der

Haus
Übergabe
Amtmann
Bergmeister
Predigerkloster
Eckbehausung
Schildröhre
Eigenschaft
Eigenzins

Objekt in der Deutschen Digitalen Bibliothek

05.06.2025, 12:59 MESZ