Befehlsschreiben der Herzoge Otto und Ernst (der Bekenner) von Braunschweig-Lüneburg (Celle) an die Untertanen ihres Anteils an Butjadingen, dass sie Graf Johann V. von Oldenburg als ihrem Landesherrn zu huldigen haben. Von Gotsgnaden wy Otto und Ernst gebrodere, hertogen tho Brunswig und Luneborch, entbeden ju den erszamen unszen leven getruwen vogheden, domdeleren, karksworen, gemeynen dycksworen und gantzer gemeyne unses deyls im Buthjadingerlande unszen gunstigen grot und dhon ju hir mede weten, dat wy uth redelyken bewechlyken ursaken und mith rypem rade und guder vorbedacht unser und unszer rede verorsaket und bowogen syn, ju mith denne eyden und plichten, dar midde gy uns und unszen erven thogedhane und vorwanth sydt, an den wolgebornen hern Johanne graffen tho O. und D. unsere leven ohemen und seyne ervene tho wyszen, alsz wy dann hir mede dhon in der besten forme und mathe, wu dat syn schall, kann und mach, und willen ernstlick gy ju nach omhe und seynen erven hinforder und in thokompftigen tyden richten und holden schullen, glyck gy eyne tydther ju gegen uns geholden vorplichtigett gewest, ju dar weder ock nicht setten oder stiven by vormydinge unszer Ungnade und straffe, und hebben tho notturft des sulftigen de erbaren und werdigen Dederyke von Duvenheim, unsern hof marschalck, Ludeloff Klencken, drosten tho der Hoya, und hern Joachim Ruwen secretarium bett thom Obelgünne vorferdiget und den sulvigen befoihen, soichs ju wyder antotzeigen und thoszehen, dat gy gemeltem unszem ohemen von Oidenburgh und seinen erven eyde und plichte dhon und nicht weigeren schullen, und tho notturft dessulvigen ju juwer eyde und plichte und aller vorwanthnisz, dar gy uns mith vorwanth syn, tho vorlaten, gnediger thovorsicht, gy werdene ju des alszo holden und ernstlyken dar nach richten, dar midde wy sampth unszerem ohemen von Oldenborch, ifte gy vorsettlick und hiranne ungehorszam syn wordene, nicht verorsaket werdene, ju tho straffen und tho geborlyken gehorszam tho bringen. Welcks wy ju, dar midde gy ju des alzso tho holden weten hedden, nicht wolden verholden hebben, des tho Urkunde unsze ingeszegelle unden an dussen breff withlyken heyten hangene. Datum Zcell sonnavend nach Martini im vefteinhundersten und dreundetwintigisten jare. 1523 November 14, Celle (Zcell, sonnavend nach Martini im vefteinhundersten und dreundetwintigisten jare)
